P全球【世界台】外交政策佮bàn-bah貼紙

文 / 周盈成

以下這篇短文,是用教育部公布的臺灣閩南語標準用字寫成。一點都不難,只要認得中文(還用說,不然怎麼讀到這裡)、略通台語, 其實就懂八九成了。還有聲音檔唸給你聽,好多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

美國總統Barack Obama主導 Iran核子問題的談判,4月初談成原則要點,有希望佇6月底 以前達成協議。另外,伊閣佮Cuba總統Raúl Castro見面會談,推動兩國外交正常化。贊成者呵咾伊行務實路線,毋過共和黨佇國會抵制,講伊讓步濟。有意願抑是有可能佇2016年參選總統的共和黨人士,攏主張強硬的外交政策。

英國《金融時報》副總編輯Philip Stephens拜五的一篇文章,共遮的主張稱做「bàn-bah貼紙」的世界觀。

美國人時行佇車的bàn-bah(保險桿)頂頭貼一寡標語,表達家己的主張、趣味抑是講一寡笑詼。Stephens就是剾洗共和黨,講in欲按怎處理中東、中國佮Russia,只是家己喝爽的。

重點是:美國已經無像以前強大矣。而且,冷戰結束了後的世界,袂當簡單看做正邪雙方之爭。比論講,Islam國是一个大威脅,毋過Iran閣是Islam國的死對頭。作者認為,Obama有認清這个複雜的世界新形勢,伊佮Iran發展關係是真有勇氣的一步。

Stephens嘛毋是完全咧替Obama辯護。伊認為,對Obama的批判內底,有部分道理的,是講伊為著結束前總統George W. Bush留落來的兩場戰爭,Iraq佮Afghanistan ,煞佇其他所在傷過細膩。這全世界的盟邦佮敵人看在眼內,有不利的影響。

舉例講,Syria政府一再用化學武器攻擊平民,早就過Obama的紅線,毋過美國攏無實際行動。中國佇東海佮南海直直出招,就是估算美國想欲避免衝突。

佇結論,作者講,Obama的優點是伊注重使用經濟佮外交的力量,透過種種的多國聯盟,來發揮美國的影響力。缺點是伊有當時仔閣傷過限制使用美國的力量。現此時美國需要的,是佇企圖心佮現實主義中間著平衡,發展出一套原則清楚閣會當執行的大戰略。

 

您可以 留言回應, 或 追蹤

1 篇回應 to “【世界台】外交政策佮bàn-bah貼紙”

  1. 台米人 說:

    照出生的資料來看未來十年內世界的中東回教徒人數會增加到比基督教徒較濟,台灣不知有若濟人瞭解這項事實並且做好因應的對策?

留言