P全球【世界台】同性婚合法化 閣來看澳洲

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

Ireland頂個月公民投票通過同性婚合法化,鼓舞著世界上的同性戀人權運動,紲落幾個月,澳洲凡勢嘛會變天。國會預定佇年底以前投票決定 。目前,大部分民意支持同性婚,只是國會議員真濟猶閣咧觀望。


領導保守聯盟的澳洲總理Tony Abbott本人反對同性婚姻,毋過贊成開放伊的自由黨的議員照家己意思投票。只不過這閣牽涉著聯盟內底其他黨派的意見。若是真正開放投「良心票」,通過修法來承認同性婚的機率會較大。

在野的工黨,絕大部分議員攏支持同性婚。進前綠黨佮Abbott的自由黨同事攏已經提出支持同性婚合法的法案。6月初工黨閣提出一案,被批評是欲來割稻仔尾,顛倒會拍歹共識, 變成政黨相爭。澳洲廣播公司(ABC)的一篇分析文章講,若是會當閣出一个跨黨派的第四案,一黨一案,改革較有贏面

頂年7月,一間研究公司Crosby Textor做的民調講,72%的澳洲人支持同性婚合法化。這个比例比十年前成長強欲一倍。

國會議員咧?英國《衛報》的澳洲版最近一个一个訪問下議院全部的150位議員,若是開放投良心票,in的立場啥款。頂禮拜三公布結果,有63位贊成同性婚合法、40位反對,毋過猶未決定抑是表態的人數真濟,有47位,到時的輸贏猶閣真歹講。

既然支持改變的民意超過七成,是按怎政治人物猶閣袂著?前述的民調公司負責人對英國廣報公司(BBC)講,一寡議員對保守勢力驚惶過度。伊講:「保守的基督教團體吵甲真大聲,毋過講到底in是真少數,無啥要緊。」

工黨的副領袖Tanya Plibersek嘛講,並毋是所有天主教徒攏反對同性婚。

佇咧爭論熱的這時,有一對結婚已經十冬的翁某宣布,若是國會通過同性婚合法,in就欲來離緣表示抗議。佇首都Canberra的Jensen夫婦講,若準國家欲改變婚姻的定義,去納入同性的關係,婚姻就不再是符合上帝旨意的神聖制度,in無愛參加彼種新的定義。

澳洲國會捌佇2012年表決同性婚合法化議題,贊成派輸甲真悽慘。ABC的分析認為,以現在國內外贊成派的氣勢,這會真無仝,最有利的狀況,上緊可能佇8月就會過關。

 

本文特色圖片:澳洲墨爾本爭取婚姻平權遊行的參與者。取自"Flickr-"Equal Marriage Rights rally"by"Azhar J"

本文特色圖片:澳洲墨爾本爭取婚姻平權的的參與者。取自”Flickr-“Equal Marriage Rights rally“by”Azhar J.”

您可以 留言回應, 或 追蹤

留言