P全球【世界台】Norway兒福單位強勢 被批評拆散家庭

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦

 

Norway佇真人印象中,是一个社會民主的理想國,毋過較少人知的,是in國家對爸母教養兒童的強力介入。最近,一對翁某據稱是因為體罰,五个囡仔攏予社工tshuā走,幾個月後才送轉來一个,事件引起國際抗議。

 

抗議者拜六佇20幾个國家連線行上街頭,指控Norway的兒童福利局(Barnevernet)偷囡仔、拆散家庭。佇Romania的抗議,規模尤其大,因為這改的事件,囡仔的老爸是Romania的移民,一个電腦專家。

 

 

英國廣播公司(BBC)報導代誌的經過:舊年11月的一个下晡,佇Norway偏遠庄跤的R夫婦等無十歲佮八歲的兩个查某囝散學轉來,煞是兒福局的人來挵門,講in已經兩个囡仔載去緊急安置矣,並且叫R太太去警察局一

 

兒福局講R夫婦有囡仔的嫌疑,in並且共厝內五歲、兩歲的兩个查埔囡仔嘛tshuā走,一个三個月的屘囝。第二工,兒福局的人閣坐兩台車來矣,R夫婦叫是in總算調查好勢,共囡仔送轉來矣。結果毋是,是嬰仔嘛欲抱走。

 

Norway的法律禁止體罰,做護士的R太太承認有時仔若囡仔做毋著,in翁仔某會共拍,毋是時常,嘛無拍著傷。伊無想著代誌會遮爾嚴重。

 

五个囡仔被安置佇三个臨時的寄養家庭。爸母干焦去看屘囝,來回的路途就愛八點鐘 。這个嬰仔總算佇4月初予人送轉來矣,較大漢的四个會按怎,閣愛等5月底法院的決定。兒福局講可能會永遠佮in分開。

 

以上這个案件的內容,攏是這對夫妻講的;兒福局方面依法袂當講出個案細節。毋過這毋是孤立事件。自2008至2013年,予兒福局tshuā離開家庭的囡仔人數,增加差不多50%。通常的理由竟然只是講爸母「欠缺育飼囡仔的技能」。

 

Norway的媒體報導,甚至一出世就tshuā走的嘛袂少,2014年就有44人。這個月拄好有一案,是一對雙生姊妹仔出世就予兒福局抱去,理由是in 24歲的阿母有精神病,後來證明這項11年前做的診斷無正確,嬰仔才抱轉來,兒福局嘛無會失禮。

 

最近,Norway 170位律師、心理學家、社會工作專家連署聲明要求改革,批評兒福局是一个「失能的組織,做出真濟錯誤的判斷」。其中一位律師講,這个制度當初的目的是幫助家庭,毋過兒福局這馬已經發展出一種控制爸母表現的體系,傷過專斷,而且時常先共囡仔tshuā走才做評估,這對囡仔是真大的風險。

 

兒童佮平等部的一位官員對BBC講兒福局做的基本上無毋著,毋過部內已經欲進行檢討。

 

【世界台】Facebook專頁

 

圖片來源:Norway Return the children to Bodnariu Family

特色圖片:4月16號彼日將近3000位民眾佇Romania首都Bucharest參加抗議Norway兒童福利部門的活動。(相片來源:Norway Return the children to Bodnariu Family)

 

您可以 留言回應, 或 追蹤

留言