P全球【世界台】Myanmar換政權 美國制裁未取消

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

美國國務卿John Kerry佇禮拜訪問Myanmar,代表後者政權轉換了後雙方關係一个新ê開始。毋過美國猶是維持真大部份對Myanmar ê制裁,因為Myanmar ê真企業猶是軍方佮in ê關係者咧掌握。

 

 

美國佇5月17宣佈新ê對Myanmar制裁計畫,七間國營企業佮三間國營銀行解禁,美國企業自tsit-má開始會使佮in往來。另外koh kā六間集團ê公司新加入去烏名單,這个集團牽涉著賣毒品。目前猶koh有百个個人佮團體佇美國ê烏名單頂頭,主要攏是佮軍方有關係。美國繼續禁止進口Myanmar ê玉仔。

 

美國自1988年開始對Myanmar ê軍事獨裁政權實施制裁。軍政府自2011開始民主改革,第二年美國解除一部份ê貿易佮投資禁令。舊年11月,Myanmar進行民主選舉,Nobel和平獎得主Aung San Suu Kyi領導ê全國民主聯盟(NLD)大贏,真濟美國企業就遊說政府對Myanmar全面取消制裁。

 

禮拜,Kerry佇Myanmar首都Naypyidaw佮Aung San Suu Kyi會談了後講,完全解除制裁ê關鍵是Myanmar愛繼續民主化、減少軍方ê影響力;毋過若無修改憲法,這就無可能。

 

2008年制定ê憲法保留真大ê權力予軍方,國會兩院有1/4 ê席次是軍方直接派代表,毋免選;國防、內政佮邊界事務三个部ê部長是軍方提名。Aung San Suu Kyi mā因為憲法專工針對伊設ê障礙,袂使選總統,伊tsit-má是外交部長、總統府事務部長佮國務顧問。

 

美國ê壓力毋是kan-na針對軍方,同時也要求3月底上台ê新政府改善少數民族Rohingya人ê處境。Rohingya人是佇西部邊境地區ê Muslim,受著佛教徒主流社會壓迫佮排斥,無公民權,過了真悽慘。新政府mā無想欲這个問題。

 

人權運動者指出,毋但過去政府ê暴行無受著追究,軍方佇邊境對少數民族ê迫害koh咧進行,新政府ê作為mā無夠。佇遮的情形明顯改善以前,美國應該愛維持制裁,繼續對Myanmar有責任ê各方施壓。

 

8001412273_e3d33859e3_o

舊年11月,Myanmar進行民主選舉,Aung San Suu Kyi 領導ê全國民主聯盟(NLD)大贏,真濟美國企業遊說政府對Myanmar全面取消制裁。(特色圖片:支持翁山蘇姬的圖片。Photo credit Ko Khu Daun,以CC 2.0姓名標示方式授權。)

 

【世界台】Facebook專頁

您可以 留言回應, 或 追蹤

留言