P全球【世界台】對啥人的攻擊?Orlando慘案的爭論

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

 

美國Orlando ê同性戀夜總會發生50个人死亡ê恐怖攻擊,引起一種辯論:這是一場針對同性戀者ê歧視犯罪,抑是對規个社會ê攻擊?為著這點意見無仝,一位英國專欄作家煞佇電視ê現場節目,起呸面做伊走。

 

32歲ê Owen Jones是英國《衛報》ê專欄作家,伊是男同性戀者,寫ê政治社會評論立場偏左。禮拜暗,伊上Sky電視頻道ê現場新聞評論節目,伊講,Orlando ê屠殺,「是恐怖主義,是一件畏同性戀(homophobia)ê歧視犯罪,是西方世界幾若世代以來針對同性戀、雙性戀佮跨性別者(LGBT)上嚴重ê暴行,這點一定愛大聲講出來。」

 

西班牙Barcelona舉辦悼念Orlando槍擊事件的守夜活動,參加者佇塗跤舖一面象徵LGBT驕傲的彩虹旗,一名參加男子共蠟燭囥佇頂懸。攝影:©Jordi Boixareu,以創用 cc 2.0 姓名標示-非商業性-禁止改作 (CC BY-NC-ND 2.0) 條款授權。

Barcelona 民眾悼念 Orlando 槍擊事件活動,一名男子共蠟燭囥佇塗跤的虹旗頂懸。攝影:©Jordi Boixareu,以創用 cc 2.0 姓名標示-非商業性-禁止改作條款授權。

查埔主持人講,這場攻擊應該是針對人類,針對所有想欲出去ê人ê自由,不管in是啥物款人,敢毋是?就親像舊年11月佇Paris ê Bataclan劇院發生ê仝款。Jones氣一下講,「你無了解,因為你毋是gay!」另外一位查某來賓伊反駁,講袂當講因為伊是gay,就會使佔有這件罪行引起ê驚惶。

 

Jones講,若是一个人行入去一間猶太教堂,死一大陣猶太人,咱會講這是一場反猶攻擊。Orlando ê殺手刁工揀一間gay club落手,伊ê老爸koh講伊進前捌看著兩个查埔相唚,就受氣,這明顯是針對LGBT。Jones問兩位對談者,是按怎欲轉移重點?伊氣怫怫,過一時仔就kā胸前ê mài-kuh掉,佇鏡頭前做伊走矣。

 

仝一工佇《紐約時報》,mā是男同性戀者ê專欄作家Frank Bruni發表ê看法佮Jones無啥仝。伊認為兇手揀這个所在是有意圖ê,毋過伊講,除了對在場ê人,這嘛是對「自由」本身ê攻擊,對多元社會ê攻擊。

 

佇美國

美國對同性戀者ê安全保障嘛無夠。攝影: Fibonacci Blue,以創用 cc 2.0 署名條款授權。

目前ê消息講兇嫌佮Islam國可能有意識形態ê牽連,Bruni指出, 極端Islam份子對同性戀者非常殘忍,kā in uì厝頂落去;同性戀者佇世界濟濟所在人刣、予人苦毒;佇美國,同性戀者ê安全保障嘛無夠。

 

毋過伊講,「這毋是身份政治ê時陣」,伊引用Barack Obama總統ê話,呼籲美國人愛團結,對抗偏激ê意識形態。

 

是按怎,對事件ê本質,有這種爭論?一方面是因為LGBT特別弱勢ê處境。Jones佇隔轉工ê文章內底,再度抗議主流社會對LGBT ê忽視。另外,伊對Islam汙名化ê問題可能也較敏感,伊推測兇手只是用宗教來合理化家己畏同ê心理。Jones並且警告,這件慘案毋通予排外ê人利用去。

 

美國 Minnesota Minneapolis 三千位民眾佇公園悼念 Orlando 同性戀夜總會槍殺事件的死難者。攝影:Fibonacci Blue,以創用 cc 2.0 署名(CC BY 2.0)條款授權。

美國 Minnesota Minneapolis 三千位民眾佇公園悼念 Orlando 同性戀夜總會槍殺事件的死難者。攝影:Fibonacci Blue,以創用 cc 2.0 署名(CC BY 2.0)條款授權。

 

【世界台】Facebook專頁

您可以 留言回應, 或 追蹤

留言