P全球【世界台】蹛海邊管真闊?法國ê禁burkini爭論

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

法國幾若个海邊所在最近宣佈禁止burkini,就是Muslim查某穿ê一種身軀包kah峇峇ê游泳衫。連總理都表態支持禁令。這敢是明ê歧視Muslim?自由國家哪會管kah人穿啥咧?其實,考慮著法國ê世俗主義(laïcité)傳統,代誌無遐爾簡單。

 

法國總理Manuel Valls頂禮拜講,Nice等城市禁止burkini有道理,因為這種穿插佮法國ê價值袂合。伊講海邊佮其他ê公共場所仝款,無應該出現宗教ê主張,而且burkini表達一種奴役女性ê政治方案。毋過Valls表示無欲佇全國實施禁令。

 

佇Brussels ê記者Tim King分析,英語國家ê人會感覺這是小題大作,毋過對真tsē法國人來講,政教分離、世俗主義是法國大革命ê精神,是這个國家ê核心價值,是無參詳ê。法律禁止各種宗教ê符號佇非宗教ê公共場合出現,毋是干焦針對Islam。

 

在這个立場看來,burkini代表Islam群體內底對女性ê壓迫,國家應該愛阻止這種壓迫,保護個人ê權利。

 

毋過King講,法國世俗主義ê興起,當初是對抗勢力真大ê天主教會,tsit-má時代背景無仝矣, 世俗主義看起來若像一種官方認可ê反Islam主義,而且koh著一種國族主義ê色彩,就是講:既然世俗主義是國家認同ê重點,若無符合這點,就敢若是反法國。

 

伊koh講,其實,法國ê世俗主義佇歷史上ê實踐也無遐爾純,也bat對天主教會讓步。Tsit-má,面對Muslim增加ê社會新現實,做法mā應該愛調整,踏硬顛倒會替極端主義創造環境。

 

社會學者Philippe d’Iribarne贊成禁止burkini,伊認為這種Islam ê服裝是咧宣示一種「Muslim無可能完全加入非Muslim社會」ê立場。伊承認穿burkini ê女性可能各人有各種無仝ê動機,毋過伊講,既然外在ê效果攏是咧宣傳一種社會規範,個人心內ê動機是啥,並無重要。

 

另外一位學者Jean Baubérot講,嚴格ê世俗主義者界線畫毋著所在矣。伊講,應該愛區分真正危險ê物件,佮可能會予你袂爽快但是民主社會會當接受ê物件。若無,恐驚會kā對極端主義ê戰爭,轉變成社會ê內戰。

 

特色圖片:埃及Alexandria海邊穿burkini泳衫的女子。相片作者:Giorgio Montersino,以創用CC 2.0 姓名標示─相同方式分享條款授權。

特色圖片:埃及 Alexandria 海邊穿 burkini 游泳衫的女子。相片: Giorgio Montersino,以創用 cc 2.0 姓名標示─相同方式分享條款授權。

 

【世界台】Facebook專頁

您可以 留言回應, 或 追蹤

留言