P全球【世界台】半世紀內戰結束 Colombia新ê未知

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

一場內戰超過半世紀,死22萬人,總算政府佮叛軍簽協議正式停火矣,來愛koh公民投票,看全民有同意無。這是Colombia現此時ê狀況。有啥物理由拒絕這个和平ê機會咧?主要,是轉型正義ê問題。

 

Colombia上大ê左派游擊隊FARC,自1964年開始,以庄跤佮樹林做基地,和政府相戰。雙方koh加上右翼民兵,攏犯下真tsē暴行。FARC並且用賣毒品來錢。這是西半球現代上長佮目前為止最後ê一場戰爭,佇這个人口4800萬ê南美國家,受害者除了死傷、予人綁票ê,koh有數百萬人逃難。

 

現任總統Juan Manuel Santos決定和談,自2012年開始,政府佮實力已經衰弱ê FARC,佇Cuba首都Havana會談。8月24,協議總算簽落去。Santos講, 這日代表「戰爭ê痛苦佮悲劇,欲開始煞尾矣」。

 

悲劇長傷深,新ê局面甚至予人毋知欲按怎看待。43歲ê作家Juan Gabriel Vásquez寫講,伊在內ê幾若代Colombia人,規世人到今毋捌活過這个國家ê人無咧相ê歲月。「久長ê戰爭,人性上基本ê概念腐蝕掉,甚至會予人感覺戰爭ê確定性,包括會當預測ê風險、清楚ê敵人,佮永遠佇別位倒落去ê受害者,比起和平ê無確定,koh較予人會接受。」

 

照和平協議,舊年就已經實質停火ê FARC,向聯合國ê人員交出武器。過去ê刣人綁票,若是認罪,就毋免去監獄關,干焦著限制行動佮做社區服務,上長八年;較輕ê罪比論賣毒品,會得著特赦。FARC會使轉型做一个一般ê政黨,參與選舉。

 

真tsē人袂當接受,認為予FARC傷好過,無正義。前總統Álvaro Uribe tshuā-thâu反對這个協議,伊主張叛軍ê要犯應該愛入櫳仔,而且袂使參政。伊呼籲民眾佇10月初2 ê公投投反對票,要求重協商。

 

毋過一寡評論認為這無實際,眼前應該是創造今後ê和平較要緊;FARC無可能接受對in傷不利ê條件,若是協議公投無過,in袂投降,戰爭會koh再來。

 

最近ê民調顯示反對派ê氣勢有起來,兩ê支持度差不多,結果猶真歹講。準做到時協議通過,實行也是充滿挑戰:官方佮FARC敢會相互信任?毒品買賣敢會當控制?解散ê游擊隊員,敢會當順序加入社會?政府敢有法度照承諾,改善農村散赤ê問題?而且koh有其他較細ê叛軍準備欲搶FARC留落來ê地盤。

 

佇國民ê心理上,可能就像Vásquez寫ê,愛接受過去ê真相有毋但一種ê版本,學習這點ê過程,才拄欲開始。

 

特色圖片:今年6月,民眾在哥倫比亞首都波哥大慶祝和談的進展。攝影:Agencia Prensa Rural,以創用cc 2.0 姓名標示─非商業性─禁止改作條款授權。

特色圖片:今年6月,民眾在哥倫比亞首都波哥大慶祝和談的進展。攝影:Agencia Prensa Rural,以創用cc 2.0 姓名標示─非商業性─禁止改作條款授權。

 

【世界台】Facebook專頁

您可以 留言回應, 或 追蹤

留言