P全球【世界台】日本和露西亞快速倚近

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語, 就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

日本首相Abe Shinzo(安倍晋三)積極發展佮露西亞ê關係,這敢會當照伊向望ê,解決超過70年ê「北方領土」問題,日本國內無樂觀,總是日露兩國倚近,有牽制中國ê意思,受著戰略專家注目。

 

Abe佮露西亞總統Vladimir Putin 9月初佇露西亞遠東ê港市Vladivostok(海參崴)會談,兩人佇會後ê公開場合互相叫名無叫姓,友善ê氣氛比起四個月前佇Sochi會談ê時koh較進一步。彼陣,Abe初提出對露西亞ê新政策,包括經濟合作ê八點方案。

 

日本ê媒體tsit-má兩國當咧「快速倚近」。Abe ê目標之一,是欲解決「北方領土」問題。二次大戰結束ê時,蘇聯佔領Hokkaido(北海道)以北ê四个島佮群島,日本欲討討袂轉來,為著這,兩國終戰ê和平條約到tann猶未簽。Abe tsit-má講,往過ê爭論先邊仔、前提歸零、看向未來,雖然無講出具體ê方案。

 

2007樂施會 Abe Shinzo & Putin big head

安倍晉三發展佮露西亞ê關係,毋但想欲牽制中國,嘛想欲做露西亞佮西方國家的橋?這張圖是2007年G8 (八大工業國家) 時代,國際樂施會舉行「樂施大頭」活動,提醒八大工業國家領袖關心非洲氣候變化佮散赤問題。圖中央兩人分別扮演安倍晉三佮Putin。作者:Craig Owen / 國際樂施會 Oxfam International,以創用CC 2.0 姓名標示─非商業性─禁止改作條款(CC BY-NC-ND 2.0) 授權。

 

日本想欲先sak經濟,來創造談政治ê條件。露西亞無想欲還小島,毋過至少歡迎經濟合作。露西亞兩年前併吞Crimea,受著西方制裁,koh搪著國際油價大落,經濟上ê打擊真傷重。伊ê遠東地區,發展一直真無順序,koh煩惱中國佇彼區ê勢力愈來愈大。引進日本ê資金佮技術,凡勢是真有利ê選項。

 

美國《外交事務》期刊網站ê一篇文章講,中國過邊界來ê資本佮移民,已經佇露西亞ê遠東真佔優勢,予Moscow真驚這片闊莽莽ê土地成做中國ê殖民地。

 

這篇文章講,Abe mā想欲露西亞較倚,來平衡中國ê勢力,伊koh想欲扮演露西亞佮西方之間ê橋,這是真大ê企圖。所以,雖然日本ê企業界對投資露西亞態度冷冷,而且Abe可能尾仔,猶是一个小島討袂轉來,伊猶原感覺值得按呢做。

 

日本首相安倍晉三。作者:Day Donaldson,以創用CC 2.0 姓名標示條款授權。

特色圖片:日本首相安倍晉三。作者:Day Donaldson,以創用CC 2.0 姓名標示條款 (CC by 2.0) 授權。

 

【世界台】Facebook專頁

您可以 留言回應, 或 追蹤

1 篇回應 to “【世界台】日本和露西亞快速倚近”

留言