P全球【世界台】Merkel應該袂做西方的救星

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

Donald Trump當選美國總統了後,一寡人期待德國總理Angela Merkel會成做西方ê領袖,一方面守護受著大眾主義衝擊ê自由價值,另方面對抗露西亞。但是不管對內抑是對外,Merkel應該是無遐爾夠力。

 

欲Merkel發揮國際影響力,首先是伊著繼續佇德國執政。伊已經宣佈爭取佇明年9月ê大選後做伊ê第四任總理任期,並且已經佇12月初6當選連任伊ê政黨–基督教民主聯盟(CDU)–ê主席。毋過,伊ê國際支持者佮國內選民對伊ê期待,並無仝款。

 

德國《時代》週刊(Die Zeit)政治記者Mariam Lau佇《金融時報》(FT)發表文章講,對Merkel ê選民來講,伊是一位愛要求原諒ê總理,因為伊對中東移民開大門,2015年,德國就收100萬人,引起國內真濟怨慼,尤其最近koh發生移民姦殺女大學生ê慘案。

 

文章講,基民盟畢竟是一个保守派政黨,伊ê黨員要求符合這个定位ê路線,要求Merkel讓步來換in ê支持,是應該ê。所以Merkel主張欲禁止佇一寡公共場所穿Burka,就是規面規身軀起來ê Muslim女性長衫。這種調整過ê立場較會當防止極右派搶票。

 

《外交事務》ê一篇分析講,德國ê移民危機這陣已經有較控制矣,加上Merkel ê讓步,伊明年可能會繼續執政。毋過伊在內ê溫和派歐洲領袖愛提防Trump分裂歐洲,因為歐盟ê價值,比論佇環境、人權、貿易等方面ê多國合作,攏是Trump佮其他大眾主義者反對ê。Trump對露西亞友善ê態度,更加予歐洲感覺不安。

 

《經濟學人》指出,Merkel個人ê決策風格較躊躇,加上德國因為過去侵略ê歷史到tann猶koh真敏感,攏會限制伊演更加強勢ê領導角色。

 

Berlin, 14.11.2016 Deutsche Jugendfeuerwehr DJF Besuch der Jugendfeuerwehr Wedding (Berlin) durch die Bundeskanzlerin Frau Dr. Angela MERKEL und der Beauftragten der Bundesregierung für Migration, Flüchtlinge und Integration Staatsministerin Frau Aydan ÖZUGUZ

特色圖片:德國總理 Angela MERKEL 佇 Berlin 參加消防隊的活動。(攝影:Rico THUMSER/DJF,以創用cd 2.0 姓名標示-禁止改作條款授權。)

 

【世界台】Facebook專頁

您可以 留言回應, 或 追蹤

留言