P全球【世界台】Trump總統之下 美國不再例外?

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

Donald Trump兩禮拜後就欲就任美國總統,伊ê外交政策會按怎行,tsē-tsē觀察家iáu-koh teh臆來去。真普遍ê一種預測,是美國恐驚會放棄二戰結束以來大力主導世局ê角色 ,自由主義ê國際秩序會衰落去。

 

這種看法,一般是佮 Trump看做孤立主義者,佇伊ê「美國第一」口號之下,美國會真無愛世界ê代誌,顧國內就好。反論當然有,認為上台ê總統,做ê無一定照競選口號。

 

《外交事務》期刊網站最近有一篇文章講,Trump可能會做ê,超出美國外交政策長久以來相tak ê介入佮退後這兩條路線之外;這个真正ê大改變,就是放捒「美國例外主義」。

 

美國例外主義這組概念,是認為美國因為伊ê歷史、地理、制度佮實力等等,是全世界獨一無二ê國家、全球ê領導者。這篇文章ê作者Stephen Wertheim講,傳統上美國ê領袖佮大眾攏是按呢想,不管in贊成介入世界深,基本上無懷疑美國註定就是世界第一等。

 

Trump埋怨美國已經變kah欲予美國「再度偉大」,照Wertheim ê解讀,意思是美國ê偉大也好、例外也好,攏是無穩定ê、有條件ê,會當得著,mā會當失去;美國佮一般ê國家無啥精差,只需要為著家己有ê勝利去拚去,毋免為著長期ê利益暫時犧牲,費氣費觸維持世界秩序。

 

作者認為,美國人猶未慣勢放棄例外主義的驕傲,Trump會引起一種「國家認同危機」,外交政策出現合法性ê空隙,左右兩派攏來拍拚搶地盤,可能會經過一段長時間ê重撨摵

 

《華盛頓郵報》講,這擺的Iowa黨員會議,兩黨攏面臨一个考驗,就是黨內傳統勢力,敢有法度抵擋能量強大的非主流候選人?共和黨方面,言行真囂俳的大業戶Trump佇拜六公佈的民調,以28%的支持度,上有贏面。圖片引自:Gage Skidmore-Donald Trump via Flickr

Donald Trump兩禮拜後就欲就任美國總統。圖片引自:Gage Skidmore-Donald Trump via Flickr

 

【世界台】Facebook專頁

您可以 留言回應, 或 追蹤

留言