P全球【世界台】美國銃管制咧諍啥? 真少通參詳

文 / 周盈成

以下短文以教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部的臺語常用詞辭典。看世界新聞,兼學台語文,就是【世界台 ~ Sè-kài Tâi】啦!

美國三不五時就發生開銃亂射事件,銃管制ê爭論就又koh熱起來,毋過因為國情特殊,有參詳ê範圍其實足細,比論銃子篋仔上tsē會當入幾粒銃子, 看會當予銃手人較慢一屑仔無。連這種「改革」mā真歹通過。

 

2月14,Florida州ê Stoneman Douglas中學發生慘案,一个19歲ê前學生涉嫌半自動長銃進入校園死17个人。事件引起全國性ê中學生示威,要求加強銃管制。

 

CNN電視台佇事發ê縣舉辦一場「公會堂」(Town  Hall)討論會,慘案ê存活者,佮死難者ê家屬當面質問政治人物。Florida州ê聯邦參議員,兩年前bat參加共和黨總統初選ê Marco Rubio,是佇維護持銃自由ê一爿。佇會中伊予一个學生直直追問,會拒絕全國長銃協會(National Rifle Association)ê獻金,伊攏毋答應。這个協會是真有夠力ê利益團體。毋過當伊講出贊成修法共買長銃ê年齡限制提,隨得著熱烈ê噗仔聲。

 

聯邦法律規定,會當買手銃ê上低年歲是21歲,毋過長銃,包括半自動銃,煞是18歲就會使買。這是銃管制ê一个中心爭點,甚至Donald Trump總統這幾工mā表態傾向修法,提懸到21歲。毋過全國長銃協會隨表示反對,講按呢「會剝奪18歲至20歲ê人受憲法保障ê自衛權利」。

 

另外有一个議題是「撞射銃」(bump stock),這是一種內底有鬥弓仔ê銃托,若是共半自動銃ê一般銃托換做這種,伊會利用開銃ê反作用力,連紲發射,速度緊kah欲機關銃。舊年10月佇Las Vegas彈死58个人了後自殺ê兇手有使用這種家私,驚動社會。撞射銃托並無用佇這改ê Florida案件內底,毋過Trump已經佇事後指示司法部研究禁止。

 

銃子篋仔方面,現此時聯邦佮大部份ê州攏無法律限制銃子ê數量,有民主黨ê參議員提案欲限制佇10發以內,毋過報導講,看起來真困難。

 

有關買銃ê人ê背景檢查,在來mā是重要ê議題,毋過目前有希望修法通過ê,只是加強聯邦佮各州資料ê流通佮更新,並毋是共會當買銃ê條件改予較嚴。

 

特色圖片:「追思與祈禱挽不回人命,但槍管可以。」周三於佛羅里達州帕克蘭的Marjory Stoneman Douglas高中發生槍擊事件之後,華盛頓特區地區學生創建Teens For Gun Reform組織,並前往白宮示威要求政府重視槍管議題。photo credit: Lorie Shaull, https://goo.gl/k3YRbz (CC BY 2.0)

【世界台】臉書專頁

您可以 留言回應, 或 追蹤

留言