P全球【世界台】西歐新反猶現象ê複雜面貌

文 / 周盈成

以下短文以教育部公布的台語標準用字寫成。認得中文、略通台語就懂八九成。還有聲音檔唸給你聽,許多字詞也有臺語常用詞辭典超連結。看世界新聞,兼學台語文,就是【世界台 ~ Sè-kài Tâi】啦!

「反猶主義」ê烏雲koh罩佇歐洲ê天頂。敢是Nazi koh來矣?其實這波無平靜和20世紀初有無仝,牽涉著Muslim ê角色,佮以色列佇中東ê作為。複雜ê互動關係,用傳統上對左、右派ê印象,較理解。

 

3月23,巴黎,85歲ê猶太老阿婆Mireille Knoll予人發現死佇伊蹛ê公寓內底,身軀予人11刀,而且放火燒過。警察掠著兩个20外歲ê嫌犯,主嫌來自北非移民家庭,自細漢就是死者ê厝邊,互相熟似。伊ê共犯講,伊進前就講Knoll是猶太人,應該真好額;而且伊刣人了後koh喝「真主偉大!」根據這兩點,官方認為這是一件反猶ê謀殺案。

 

受害者Knoll做囡仔就蹛佇巴黎。1942年,Nazi 佇巴黎大圍捕,共1萬3000外个猶太人掠去集中營,in後來差不多總無出來,9歲ê Knoll逃過彼圍捕。如今,大屠殺ê存活者煞án-ne遇害,象徵意義特別強。3月28,數千人行上巴黎街頭紀念伊,抗議種族仇恨。

 

9歲ê Knoll逃過1942年Nazi 佇巴黎的大圍捕,想袂到85歲時竟然因為反猶謀殺遇害。

自2006年一个猶太少年人予Muslim兇手刣死以後,法國ê猶太人社群就真驚惶,後來koh陸續有類似案件,毋過愛等kah 2015年,幾若件重大ê恐怖攻擊了後,主流社會才開始慢慢仔承認「新反猶」毋但存在,而且是對規个社會ê攻擊。

 

這遍ê大遊行,發動者是法國猶太團體聯合會(CRIF),事先就宣佈無歡迎極右派政黨國民陣線(Front national) 佮極左派ê硬氣法國(La France Insoumise) ê頭人來參加。國民陣線是因為有反猶ê歷史;硬氣法國是因為誠批判以色列ê Palestine政策。

 

毋過資深記者Sylvain Cypel指出,現場狀況就看會出鋩角矣。兩黨ê領袖猶是有來,國民陣線ê Marine Le Pen毋但加入遊行有一觸久仔,koh有猶太團體ê人共保護,硬氣法國ê Jean-Luc Mélenchon煞袂當,只好走。

 

Cypel分析,猶太聯合會死忠支持以色列,並且無歡迎Muslim移民,所以佮tsit-má主要teh反Muslim移民ê國民陣線較有共同點。

 

另外一方面,較慢來法國ê Muslim移民,對猶太人ê反感,有幾若个來源:家己受著排斥、共猶太人看做等於以色列,佮認為猶太人好額、統治世界等等。猶太人佮Muslim之間ê敵意互相激化。

 

佇海峽對岸,英國ê工黨仝幾日仔mā有反猶爭議。黨領袖Jemery Corbyn 六年前佇面冊頂ê一條留話予人挖出來,講伊支持一幅反猶壁畫,彼幅圖若像是teh剾洗猶太資本家。Corbyn後來會失禮。另外,有一位黨幹部,因為支持一位予人指控否認大屠殺ê地方候選人,予人抗議,來落台。

 

《經濟學人》雜誌分析講,極左派反以色列、反資本主義,雖然這無等於反猶,但是政治爭論當激烈ê時,界線定定袂明。Corbyn koh會為著反美國ê中東政策,和極端Islam份子來去

 

Corbyn這遍承諾會改正工黨內底ê反猶,毋過《經濟學人》這篇專文認為伊袂實行。除了伊個人ê極左紀錄以外,koh有兩項原因,一是英國Muslim人口比猶太人加真濟,而且集中佇對工黨真重要ê選區;二是Corbyn ê反種族主義是牽連階級佮剝削,猶太人是上成功ê少數族群,而且毋是靠社會政策,袂得著伊ê同情。

 

3月28日,數千人行上巴黎街頭紀念 Mireille Knoll,抗議種族仇恨。(圖片來源:CRIF 臉書)

【世界台】臉書專頁

您可以 留言回應, 或 追蹤

1 篇回應 to “【世界台】西歐新反猶現象ê複雜面貌”

  1. meme 說:

    感謝有你,我才會使學台語,真希望有台語電視台。

留言o meme