P全球【世界台】炸Syria化武 Trump無欲改變大勢

文 / 周盈成

以下短文以教育部公布的台語標準用字寫成。認得中文、略通台語就懂八九成。還有聲音檔唸給你聽,許多字詞也有臺語常用詞辭典超連結。看世界新聞,兼學台語文,就是【世界台 ~ Sè-kài Tâi】啦!

美英法三國頂禮拜六轟炸in講是Syria 政府化學武器設施ê目標,一般認為這袂對這場七冬內戰ê勢面有大影響。看起來,美國總統Donald Trump對Syria ê未來,並無積極ê長期策略,只是想欲冗早共美軍撤出來。

 

Trump佇這遍攻擊ê前後,攏真明確講行動ê原因佮目標就是化學武器。Syria ê Bashar al-Assad政府使用化學武器,是美國ê紅線。Trump佇這點和前任ê Barack Obama所講ê無精差,只是Obama無實際作為。

 

美國這陣有2000駐軍佇Syria東北部,支援Kurd族Islam國。自競選ê時,Trump就表示美軍佇Syria的任務是欲消滅Islam國,完成就愛緊退出。外交政策界真濟人反對這種想法,頂個月落台的前任國務卿Rex Tillerson就是。

 

佇Assad政府4月初7用化武屠殺平民進前無幾工,Trump 才連紲兩遍講,Islam國已經kah差不多,美軍teh-beh會當轉來矣,4月14 suah發動攻擊,予人懷疑伊敢是改變想法,毋過白宮隨koh聲明講並無改變。

 

智庫「外交關係協會」ê學者Robert Danin,Trump kan-na會針對化武來動手,這點Assad看在眼內,應該真安心,伊免煩惱美國會推翻伊ê政權,伊甚至袂完全放棄koh再使用化武,只要伊認為化武對伊ê戰事真有效,伊會計算,凡勢予西方炸掉幾个仔設施mā會和。這有前例,美國舊年就共炸過一擺矣。

 

美國計算,凡勢予西方炸掉幾个仔設施mā會和。舊年伊就共炸過一擺矣。

 

Beirut美國大學教授Rami Khouri,露西亞、Iran、Turkey,佮來自Lebanon、受Iran支持ê Shia派武裝團體真主黨,這四方會主導Syria ê未來。In攏早就有準備欲直接蹽落去Syria境內ê戰爭。相對來講,西方和in ê阿拉伯盟邦,雖然支持Syria ê叛軍反抗Assad,毋過無想欲長期、親身投入。

 

過去兩年,Assad政府和伊ê盟友露西亞、Iran、真主黨佇戰場頂贏面愈來愈大,Assad想欲收復內戰進前全部ê國土。目前,東北部由kurd族控制;西北部佮南部一寡所在猶有各種派系ê叛軍teh死守。

 

聯合國推動ê和平談判無進展,露西亞、Turkey、Iran ê總統另外開會談,Khouri講,這顯示Syria現時 ê狀況佮100年前誠相siāng:一次戰後,英國佮法國照in家己ê利益,主導中東新國界ê產生,其他ê外部勢力mā插一跤,當地ê人民顛倒無參與權。按呢形成ê國家,獨裁、貪腐、不穩定佮社會不公等等問題會使講必然會繼續。

 

 

【世界台】臉書專頁

您可以 留言回應, 或 追蹤

留言