標籤: ‘Lâu Sêng-hiân’

P專題【台文話藝】風颱天

文 / Lâu Sêng-hiân (劉承賢)

毋知恁對風颱天按怎看法,老實講,我以早是愛甲欲害,tse原因無講恁凡勢嘛攏知,風颱若來,學校佮補習班就免siunn理睬,看是欲踮厝- -裡the,抑是欲去外口看電影bóng ûn街,較早捌有一句時行ê話,號做「天頂ê禮物跋落地」,我往過就是按呢咧看風颱- -ê,風颱天阮就thang好涼勢仔涼勢。

毋過,風颱天歇睏毋是必然ê道理,若毋信,你看電影院佮百貨公司仝款門開開開,人客窒甲滇滇滇,另外,電視新聞內底,記者閣著刁工tshî風淋雨潦過來泅過去,袂輸咧表演特技,我是看甲飽佮醉,自按呢我決定大漢無愛踮電視台作穡,較免風颱天閣著phe命變猴戲,袂輸齒bín攑咧欲去kā 鱷魚洗喙齒,想攏袂曉台灣ê新聞製作ná會tsiah-nī-á無花字 (hue-jī)。

P專題【台文話藝】母親- -啊!啉tse苦杯

文 / Lâu Sêng-hiân (劉承賢)

-2011鄭福田生態文學獎台語詩優選

阮講kioh你是阮ê母親
無容允有人對阮ê愛憢疑
自來阮用歌佮詩kā你呵咾
翕相紀錄你無仝ê面容
做囡仔ê時你是溫馴ê月娘
佇窗仔外tshiō光
予我穩心仔睏
大漢了後才知
你是山kā天撐- -咧
你是海kā囝攬- -咧
掛箭ê風你替阮tshî
對敵ê手你替阮掰(pué)
阮不時咧跋倒
煞相信你永遠袂沉- -lueh

P專題【台文話藝】老,就厚症頭

文 / Lâu Sêng-hiân (劉承賢)

當原初發覺講,對蹛ê所在行去學校,愛行三、四十分ê時,就決定欲牽一隻鐵馬來騎- -ah,雖罔佇台北讀冊ê時,不管時嘛行欲一點鐘對學校轉厝,毋過,he究真是欲倒- -去,無趕時間,若是欲去上課,上好時間掠較ân- -leh,有伸勼較妥當。

閣再講,竹塹不比台北,佇台北行路來去轉,規tsuā路有人行道,倚車頭有地下街,行- -起-來加真放心,若tsia- -leh,光復路一段接二段hia,著tshua̍h對高速公路下跤過,經過兩个交流道,車濟無- -打-緊,幾若百公尺hiah長,煞無人行道通行,幾若十冬- -ah,咱毋知新竹市政府心內咧想啥,均屬咱都毋是在地- -ê,貧惰去捶烏豆,行路無利便,咱就踏tōng輪。

P專題【台文話藝】收冊奴想退悔

文 / Lâu Sêng-hiân (劉承賢)

自早就有一款歹習慣,想beh有hit本冊tsit本冊koh另外hit本kap hit本,若斟酌kā想,tsit十外冬,冊買規山phiânn,借規山phiânn,印規山phiânn,koh想beh翕規山phiânn,結果- -leh,真正有去讀- -ê,suah khah無一牛車,ing暗想想- -leh,tsit款症頭,無táⁿ-tia̍p bē用得- -ah。

Tsīng出社會有趁錢了後,就痟買冊,買冊ê因端,或是因為「想beh」讀,或是因為有人teh風聲,hōo咱感覺「應該」讀,koh有一寡是感覺家己有某mih款欠缺,想beh加強hit方面ê智識,總- -是,買- -來了後,khah濟是hōo in tī冊櫉仔頂罰徛;讀研究所了後,koh-khah敢死,理論ê冊印十數本…tann,hia-ê冊li-li khok-khok,若beh siàu算,十本檢采讀無三本,結局是搬厝ê時險去hōo冊硩- -死,搬kah beh死已經真連回,新siū無tè囤冊,mā只好送- -人,無,就是用行李箱仔拖去舊冊店俗賣,想- -起-來,無彩錢、無彩工、koh活歹命!

P專題【台文話藝】考試

文 / Lâu Sêng-hiân (劉承賢)

我無beh kōo講白賊- -ê烏白thi̍h,老實kā恁講:「我tsiok討厭考試!」

雖bóng我相信有人kah意考試,愈考伊是愈揚氣(iâng-khì),m̄-koh,我有問阮同窗- -ê,確實討厭考試ê人,是大多數,阮想bē-hiáu是按怎做學生tio̍h-ài hōo考試拖磨,若問大人,in以早做學生ê時,大部分mā lóng bat討厭考試,m̄-koh等in大漢- -ah,in suah 用考試來對付阮tsia-ê囡仔,kah若考試tsiah顧人怨,hōo大部分ê人無歡喜,tī tsit个民主時代,是按怎無人beh公投,kā lóng總ê考試tsiâu取消?Tsit个問題若問- -我,我應bē出- -來。好佳哉考試無考tsit條,無,我tsit个題目定著pū一粒鴨卵。

P專題【台文話藝】阮兜

文 / Lâu Sêng-hiân (劉承賢)

若講著阮兜ia̍h恁兜,m̄知逐家ē先想著啥?若照平素時仔teh講話來想,咱檢采ē講:「阮兜tī三重埔,攏總有三个房間。」Mā凡勢ē講:「阮兜有四个人,感情真好。」準備演講ê時,我有斟酌kā想,發現平平是講做「阮兜」,m̄-koh意思suah無啥仝- -neh,後- -來,老師kā我thok頭,講:「阮兜tsit个詞,確實是有兩个意思!一个,是teh講實際ê厝宅,咱徛起ê所在;koh一个,是teh講厝- -裡ê人kap互相之間ê關係。」Ah!Án-ne我tsiah真正了解!若beh講阮兜,m̄若ài講看ē著ê厝,mā ài講著爸母兄弟姊妹tsia-ê厝- -裡ê親人。